好人做壞事

我都知對人無禮貌唔好，但真係有D情況有禮貌係唔得！「怨氣」係有傳遞性架！

事情係咁，上星期一因改左寬頻電視個Plan，HKBN既師父上黎屋企換左個「寬頻盒」。果個師父話個新Remote有問題，居然叫我地用返舊果個。果時得我老父母響屋企，佢地點知發生咩事，於是放過左個師父。我返到黎先知俾人搵左笨啦！個Modem係新型號，好應該跟返個新Remote，雖然個舊既都Function到，但係換就一套咁換架啦，點會叫人地用返個舊既先得架！而且佢完全無意思叫話會幫地換返個新既返黎。臨走仲叫我老父母，如果公司打電話做意見調查，要我父母俾四分佢，佢會有幾舊水獎金喎。若然我響度，實俾條毛佢！

好啦，算啦，自己打電話上去CS度問佢攞過個Remote。打左一次，OK，話會有師父聯絡！點知等左幾日都係無音訊，再打同一個電話，幾次都無人聽！係咪放左假？咁啱既！算，打電話去總機度求助。第一次個妹妹仔仲叫我「自己」拎去換！咪住，而家係個師父做漏野，做乜叫我要花車錢同時間去自己換返先！提高語氣再同佢講一次，咁個妹妹仔就話再幫我問下，之後叫我落去附近既門市換啦！OK，fine，我去換。

落到門市，得兩個男Sales響度招呼緊客人，我等。等左成十分鐘，終於到我，我就說明來意。好，佢入倉度搞左一陣，拎左個舊型號既Remote俾我！唔係喎，我換左新Modem喎！好，再入倉度搞左一陣，拎左個黑色既Remote俾我，但係上面已經刮花左，又好D塵！大佬，你而家係咪想打發我走先！唔掂，再換過俾我啦！我已經好唔好老皮。再換，今次似返D樣，好，目的達到，算！（不過我無講唔該就走左，對我黎講十分無禮貌。）返屋企check下你有無呃我，換個唔同色既舊型號俾我先！Check左，OK，事情告一段落。

呢件事上，我覺得有時好難保持禮貌，因為你太客氣，人地就耍你！要惡形惡相，D人先唔會玩野！呢個世界居然係要逼好人做壞事先得到公平既待遇，實在太荒謬！