o靚模與我

其實我唔討厭o靚模，佢地都係用自己能力去賺錢，我覺得職業無分貴賤。有人話佢地敗壞社會風氣，我都反思左一段時間，我覺得係社會風氣敗壞之後，o靚模既生存空間先變得愈來愈大。再者香港人好多都係邊鬧邊睇，根本就虛偽同假正經，做辛苦為咩先？講真，o靚模都係出下寫真集啫，你無興趣咪唔好買唔好睇囉！報紙大肆報導，你都可以唔睇果幾篇新聞架啫！而且水著女優係由歐美、日本等地開始流行，o靚模未流行既時候，日本水著寫真已經好成功啦！香港而家先起步，已經係好遲既事。不過香港人大驚小怪，有怪莫怪啦！

不過最近我就真係幾唔鍾意睇o靚模既訪問，原因唔係佢地暴露，而係佢地把口真係好賤，成班港女係度寸來寸去，真係令人好煩。當然你會話，唔想聽咪唔好聽囉！所以我而家無再主動去接觸佢地既新聞。但偶爾睇報紙或者聽新聞都會唔覺意聽到少少，又係令人好不安。做o靚模咪好好地去拍好本寫真，為咩要寸來寸去，去人身攻擊D同行。大家都應該有生存空間啫？點解一定要踩低人地，自己上位？嗯，我諗我係最憎「踩低人地，自己上位」呢樣野。咁高調地攻擊人地，輸左就真係返唔到轉頭，其實係自掘墳墓既行為。果D無知既o靚模認真要反省下！